ឯកឧត្តមស សុខា៖ជាង៤០ឆ្នាំមកនេះគណបក្សប្រជាជនកម្ពុជាសម្រេចបានសមិទ្ធផលជាច្រើន

បាត់ដំបង៖ឯកឧត្តម ស សុខា រដ្ឋលេខាធិការក្រសួងអប់រំយុវជននិងកីឡា បានថ្លែងថា “ជាង៤០ឆ្នាំមកនេះ គណបក្សប្រជាជនកម្ពុជា សម្រេចបាននូវសមិទ្ធផលសំខាន់ៗជាច្រើនរួមមាន៖ រំដោះប្រទេសជាតិចេញពីសោកនាដកម្មដែលបង្កឡើងដោយរបបខ្មែរក្រហមការបង្រួបបង្រួមជាតិរវាងភាគីខ្មែរដែលមានជម្លោះរហូតឈានដល់មានសន្តិភាពពេញលេញនៅកម្ពុជា”។

ឯកឧត្តម ស សុខា រដ្ឋលេខាធិការក្រសួងអប់រំយុវជននិងកីឡាបានថ្លែងថា ជាង៤០ឆ្នាំមកនេះ គណបក្សប្រជាជនកម្ពុជា សម្រេចបាននូវសមិទ្ធផលសំខាន់ៗជាច្រើនរួមមាន៖ រំដោះប្រទេសជាតិចេញពីសោកនាដកម្មដែលបង្កឡើងដោយរបបខ្មែរក្រហមការបង្រួបបង្រួមជាតិរវាងភាគីខ្មែរដែលមានជម្លោះរហូតឈានដល់មានសន្តិភាពពេញលេញនៅកម្ពុជា។រូបភាព៖សាន់ ផានិត

ការថ្លែងបែបនេះរបស់ឯកឧត្តម ស សុខា ធ្វើឡើងក្នុងឱកាសជាតំណាងដ៏ខ្ពង់ខ្ពស់សម្តេចក្រឡាហោមស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃនិងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបងនិងវត្តមានដ៏ខ្ពង់ខ្ពស់លោកជំទាវ ញ៉ែម សាខន ស ខេង តំណាងក្រុមអ្នកម្តាយមនុស្សធម៌ អញ្ជើញជាអធិបតីក្នុងពិធីសំណេះសំណាលនិងប្រគល់អំណោយដ៏ថ្លៃថ្លារបស់សម្តេចក្រឡាហោមសខេងនិងលោកជំទាវជូនដល់ប្រជាពលរដ្ឋដែលជួបការលំបាកផ្នែកជីវភាពចំនួន ២០០គ្រួសារ ក្នុងស្រុកភ្នំព្រឹក នៅព្រឹកថ្ងៃទី០៤ ខែមិថុនា ឆ្នាំ២០២៣ នេះ។ឯកឧត្តម ស សុខា បានថ្លែងបន្តថា ក្នុងនោះដែរភាពក្រីក្ររបស់ប្រជាពលរដ្ឋ ត្រូវបានកាត់បន្ថយជាបន្តបន្ទាប់ ជីវភាពរបស់ប្រជាពលរដ្ឋត្រូវបានលើកកម្ពស់ជាលំដាប់ សន្តិសុខ សណ្តាប់ធ្នាប់និងសុខសុវត្ថិភាពសង្គមមានភាពល្អប្រសើរលទ្ធិប្រជាធិបតេយ្យចាក់ឫសកាន់តែរឹងមាំក្នុងសង្គមខ្មែរ។ទន្ទឹមនឹងនេះកិត្តិយសជាតិ ក៏ត្រូវបានស្ដារ និងលើកស្ទួយឡើងវិញលើឆាកអន្តរជាតិ ដោយកម្ពុជា បាន និងកំពុងតែចូលរួមដោយស្មើភាព និងស្មើសិទ្ធិនៅក្នុងកិច្ចការអន្តរជាតិនានា ទាំងក្របខណ្ឌតំបន់ និងសកលលោក។ថ្លែងក្នុងឱកាសនោះដែរ ឯកឧត្តម ស សុខា បានគូសបញ្ជាក់ថា សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ធ្លាប់មានប្រសាសន៍ថា រាល់សមិទ្ធផលដែលគណបក្សបានសម្រេចជូនជាតិមាតុភូមិ ក្នុងរយៈពេល ៤០ឆ្នាំមកនេះ គឺអាស្រ័យដោយគណបក្ស មានភាពត្រឹមត្រូវខាងនយោបាយ មានការគាំទ្រពីប្រជាជន មានរចនាសម្ព័ន្ធរឹងមាំ និងធនធានមនុស្ស ប្រកបដោយ គុណធម៌ និងសមត្ថភាព មានសាមគ្គីភាពឯកភាពផ្ទៃក្នុងរឹងមាំ និងរបៀបរបបធ្វើការងារត្រឹមត្រូវ។ឯកឧត្តម ស សុខា បានគូសបញ្ជាក់ដែរថា សម្រាប់ខ្ញុំ គឺវាមិនមែនជារឿងចៃដន្យនោះឡើយ ដែលគណបក្សប្រជាជនកម្ពុជា ទទួលបាននូវការគាំទ្រពីប្រជាពលរដ្ឋភាគច្រើននៅទូទាំងប្រទេសនោះ។ ការណ៍នេះ ក៏ដោយសារថ្នាក់ដឹកនាំរបស់គណបក្ស តែងតែលើកទឹកចិត្តនិងជំរុញឲ្យមន្ត្រីពាក់ព័ន្ធទាំងអស់គ្រប់លំដាប់ថ្នាក់ ចុះទៅតាមមូលដ្ឋាននានាដើម្បីស្វែងយល់ក៏ដូចជាក្តាប់ឲ្យបាននូវតម្រូវការចាំបាច់ បញ្ហាប្រឈម រួមទាំងសំណូមពររបស់ពលរដ្ឋ ក្នុងន័យឆ្លើយតបឱ្យបានទាន់ពេលវេលាដោយមិនមានការរើសអើងនិន្នាការនយោបាយនោះឡើយ។ ពោលគឺទីណាពលរដ្ឋមានទុក្ខ ទីនោះមានមុខមន្ត្រីពាក់ព័ន្ធ ចុះសម្របសម្រួលស្ថានការណ៍ ក៏ដូចជាដោះស្រាយបញ្ហាភ្លាមៗដែរ៕សេង បូលីន