រុស្ស៊ី​កោះ​​ហៅ​អ្នកកា​រទូត​​អា​មេរិក​ជា​បន្តបន្ទា​ប់​​​សម្រាប់​​ការ​អត្ថា​ធិប្បាយ​របស់​​ទីប្រឹក្សា​សេ​តវិមាន

ប្រទេសរុស្ស៊ីបានកោះហៅអ្នកការទូតជាបន្តបន្ទាប់នៅស្ថានទូតអាមេរិកដើម្បីតវ៉ាចំពោះ"ការលើកឡើងដែលមិនអាចទទួលយកបាន"ពីទីប្រឹក្សាសេតវិមាន Sullivan ។

ទីប្រឹក្សាសន្តិសុខជាតិរបស់សេតវិមានលោក Jake Sullivan ថ្លែងក្នុងសន្និសីទប្រចាំថ្ងៃនៅឯសេតវិមានក្នុងទីក្រុងវ៉ាស៊ីនតោន ថ្ងៃទី១២ខែធ្នូ ឆ្នាំ២០២២។រូបថតAP

ក្រសួងការបរទេសរុស្ស៊ីបាននិយាយថា "មន្ត្រីជាន់ខ្ពស់នៃបេសកកម្មការទូតអាមេរិកនៅទីក្រុងម៉ូស្គូត្រូវបានកោះហៅទៅកាន់ក្រសួងការបរទេសរុស្ស៊ីកាលពីថ្ងៃទី២៦ឧសភា។ រុស្ស៊ីប្រឆាំងយ៉ាងខ្លាំងចំពោះការបញ្ចេញមតិដែលមិនអាចទទួលយកបានពីទីប្រឹក្សាសន្តិសុខជាតិសេតវិមានJakeSullivanលើការវាយឆ្មក់របស់អ៊ុយក្រែនលើទឹកដីរុស្ស៊ី" ។យោងតាមទីក្រុងម៉ូស្គូការអត្ថាធិប្បាយរបស់លោក Sullivanបានបង្ហាញឱ្យឃើញថាសេចក្តីថ្លែងការណ៍របស់សហរដ្ឋអាមេរិកពីមុនដែលថាពួកគេមិនបានលើកទឹកចិត្តអ៊ុយក្រែនឱ្យវាយប្រហារលើទឹកដីរុស្ស៊ីគឺជា "ក្លែងក្លាយនិងមិនស្មោះត្រង់"។រុស្ស៊ី​ក៏បាន​ចោទប្រកាន់​អ៊ុយក្រែន​ថា​បាន​ប្រើប្រាស់​សព្វាវុធនិង​ឧបករណ៍​ដែល​ផ្តល់​ដោយ​អាមេរិក​ដើម្បី​អនុវត្ត​អំពើ​ភេរវកម្ម។រុស្ស៊ីនិយាយថាសកម្មភាពអរិភាពពីអាមេរិកបានរុញទំនាក់ទំនងទ្វេភាគីឱ្យធ្លាក់ចូលទៅក្នុងវិបត្តិដ៏ជ្រៅនិងគ្រោះថ្នាក់ជាមួយនឹងផលវិបាកដែលមិនអាចទាយទុកជាមុនបាន។ទីក្រុងម៉ូស្គូក៏បានព្រមានអំពី "ការឆ្លើយតបយ៉ាងម៉ឺងម៉ាត់ចំពោះគ្រប់ទម្រង់នៃការឈ្លានពានប្រឆាំងនឹងរុស្ស៊ី"។ក្រសួងការបរទេសរុស្ស៊ីមិនបានបញ្ជាក់ពីការអត្ថាធិប្បាយណាមួយរបស់ Sullivan ដែលខ្លួនឆ្លើយតបនោះទេ។នៅក្នុងបទសម្ភាសន៍ជាមួយ CNN កាលពីថ្ងៃទី២១ខែឧសភាលោកSullivanត្រូវបានសួរថាតើអ៊ុយក្រែនគួរតែមានអាវុធដែលអាចវាយប្រហារគោលដៅរបស់រុស្ស៊ីនៅគ្រីមៀដែរឬទេ។"យើងមិនដាក់កំហិតលើការវាយឆ្មក់របស់អ៊ុយក្រែនលើទឹកដីរបស់ខ្លួន ក្នុងព្រំដែនដែលទទួលស្គាល់ជាអន្តរជាតិ។អ្វីដែលយើងបាននិយាយគឺថា យើងមិនអនុញ្ញាតឱ្យអ៊ុយក្រែនប្រើប្រាស់ប្រព័ន្ធរបស់អាមេរិកប្រព័ន្ធបស្ចិមប្រទេសដើម្បីវាយប្រហារអ៊ុយក្រែន។វាយប្រហារលើទឹកដីរុស្ស៊ី។ ហើយយើងជឿថាគ្រីមៀជាកម្មសិទ្ធិរបស់អ៊ុយក្រែន” លោក Sullivan បានឆ្លើយតប។រុស្ស៊ី​បាន​បញ្ចូល​ឧបទ្វីប​គ្រីមៀទៅក្នុង​ទឹកដី​របស់ខ្លួន​ក្នុង​ឆ្នាំ ២០១៤បន្ទាប់ពី​បានធ្វើ​ប្រជាមតិ។អ៊ុយក្រែននិងលោកខាងលិចមិនទទួលស្គាល់លទ្ធផលនៃប្រជាមតិដោយអះអាងថារុស្ស៊ីរៀបចំការបោះឆ្នោត។ អ៊ុយក្រែនចាត់ទុកឧបទ្វីបគ្រីមៀជាផ្នែកនៃទឹកដីរបស់ខ្លួនហើយនិយាយថា ខ្លួននឹងព្យាយាមដណ្តើមយកមកវិញ។រុស្ស៊ីបានចោទប្រកាន់យោធាអ៊ុយក្រែនម្តងហើយម្តងទៀតថាបានប្រើប្រាស់យន្តហោះគ្មានមនុស្សបើក និងយន្តហោះអត្តឃាត ដើម្បីវាយប្រហារលើហេដ្ឋារចនាសម្ព័ន្ធឧបទ្វីប ។ប៉ុន្តែក្រុងគៀវមិនបានអះអាងទទួលខុសត្រូវចំពោះឧប្បត្តិហេតុទាំងនេះទេ។កងនាវាចរសមុទ្រខ្មៅរបស់រុស្ស៊ីកំពុងបន្ថែមវិធានការការពារបន្ថែមទៀតនៅគ្រីមៀដើម្បីទប់ទល់៕ប្រភពReuters,RT